Qozog‘iston futzal terma jamoasi bosh murabbiyi Paulo Rikardo Kaka Toshkentda bo‘lib o‘tgan O‘zbekistonga qarshi o‘rtoqlik uchrashuvidagi (1:2) mag‘lubiyatdan so‘ng fikr bildirdi.

"Bunday iliq qabul uchun rahmat aytaman. Dunyodagi eng go‘zal va o‘ziga xos arenalardan biri bo‘lgan shu joyda o‘ynash imkonini berganingiz uchun minnatdorman. Ko‘pchilik bu yerda o‘ynashni orzu qiladi, biz esa bugun buni amalga oshirdik.

O‘yinga kelsak, bu ikki jamoa uchun ham foydali tajriba bo‘ldi. Ha, biz mag‘lub bo‘ldik. Italiyaga qarshi mag‘lubiyatdan keyin bu yerda ham yutqazish juda og‘ir, lekin bu lahzani yengib o‘tishimiz, ruhiy holatimizni ko‘tarishimiz kerak, chunki hayot oldinda va bu ham biz uchun katta saboq.

Bugun juda ko‘p yosh o‘yinchilar maydonga tushishdi — men ular uchun xursandman. Albatta, ularning sikllarini g‘alaba bilan boshlamoqchi edik, lekin bu ham yaxshi tajriba bo‘ldi. Ular o‘sishadi, chunki bu — bizning yangi avlodimiz", — dedi Kaka.