Futzal bo‘yicha mamlakat milliy chempionati — Oliy liga jamoalarining 4-tur uchrashuvlari shu yilning 22–25 oktyabr sanalarida Qarshi shahrida bo‘lib o‘tadi. Turga «Geolog» sport majmuasi mezbonlik qiladi.

Mazkur tur Oliy ligada birinchi davrani yakunlab beradi. Shu bois ham barcha ishtirokchilar davraning so‘nggi ikki uchrashuvidan maksimal ochko jamg‘arish harakatini qilishi aniq. Bu esa muxlislarga qiziqarli va murosasiz o‘yinlarni taqdim etadi.

4-turning har bir o‘yin kunida markaziy uchrashuvlar bor. Ayniqsa, chempionat yetakchilari — «BMB PFC», «OKMK», «SQB», «Nasaf», «Lokomotiv», «Oil Star», «Bunyodkor» jamoalarining o‘zaro hisob-kitobi turni «yondiradi». Shu ma’noda qashqadaryolik futzal ishqibozlari hamda Qarshi shahri mehmonlariga Oliy liganing 4-tur uchrashuvlarini o‘tkazib yubormaslikni maslahat beramiz.

Mamlakatimizning qolgan hududlaridagi sharm to‘p ishqibozlari esa 4-turning barcha o‘yinlarini «Sport» ijodiy birlashmasi telekanallarida hamda O‘zbekiston futzal federasiyasining YouTube kanali orqali to‘g‘ridan-to‘g‘ri, jonli tarzda tomosha qilishlari mumkin bo‘ladi.