Kecha — 20 oktyabr kuni O‘zbekiston professional futbol klublari rahbarlari ishtirokida yig‘ilish bo‘lib o‘tdi. Unda 2026 yilgi mavsum yuzasidan bir qator masalalar muhokama qilindi.

Ayni vaqtda O‘zbekistonda OFK lisenziyasiga ega chiqqan 17 ta klub mavjud. Ularning 16 tasi Superliga ishtirokchilari hisoblanadi. Proliga klublari orasidan faqatgina "Lokomotiv" lisenziyalash talablarini bajara olgan. Shundan kelib chiqib, Liga uchrashuvni ular ishtirokida tashkil etdi.  

Bir hafta muqaddam Liga prof klublarga “Superliga reglamenti-2026” loyihasini taqdim etgandi. Unda bir qator sezilarli qo‘shimchalar nazarda tutilgan. Kechagi uchrashuvda bu haqda yuzasidan fikr almashildi. Taxminan 4 soat davom etgan yig‘ilish davomida Liga va klublar bir qator masalalarda kelishuvlarga erishdi, endilikda reglamentdagi ayrim masalalar Assosiasiya ishtirokida ko‘rib chiqiladi va shundan keyin uning yakuniy varianti tasdiqlanadi.

Quyida uchrashuvdan o‘rin olgan mavzular bilan tanishish mumkin:  

- Superliga-2026 taqvimi;
- Superliga qur’asining yangi mexanizmi;
- Superliga stadionlarida VAR markazlarini tashkil etish masalasi;
- Superliga stadionlarini parvarishlash va ularga texnika jalb etish masalasi;
- Superliga klublari qoshidagi futbol maktablari masalasi;
- Superliga klublari tarbiyalanuvchilarini ro‘yxatdan o‘tkazish masalasi;
- Superliga klublari futbolchilarining maydondagi harakati va fiziologik holatini tahlil qiluvchi kompaniyalar bilan ishlash masalasi;
- Superliga o‘yinlari intensivligini oshirish, antifutbol holatlariga qarshi kurashish va toza o‘yin vaqtida sezilarli o‘zgarishlarga erishish masalasi;
- Superliga teletranslyasiyasi masalasi;
- Tartib-intizom qo‘mitasi masalasi;
- Stadionlar bo‘yicha ishchi guruh masalasi;
- “Superliga reglamenti” yuzasidan muhokama.

Yig‘ilishda muhokama qilingan mavzular to‘liq bayonlashtiriladi va Liga unda qabul qilingan qarorlar, jiddiy muhokamalarga sabab bo‘lgan mavzularni konkretlashtirish ustida ishlaydi. Bu bo‘yicha har qanday yangilik Liga sahifalaridan o‘rin oladi.