Italiyalik mashhur murabbiy Arrigo Sakki "Komo"ning o‘yinidan olgan taassurotlari bilan o‘rtoqlashdi. A Seriyaning 10-turidan o‘rin olgan "Napoli"ga qarshi uchrashuv 1 noyabr kuni Toshkent vaqti bilan soat 22:00'da boshlanadi.

"Napoli" 21 ochko bilan musobaqa jadvalida peshqadamlik qilmoqda. "Komo" beshinchi o‘rinda va 16 ochkoga ega.

"Men Fabregasni shaxsan tanimayman, lekin "Komo" qanday o‘ynayotganini ko‘ryapman. U Yevropaning eng yaxshi futbol universitetlarida tahsil olgan: "Arsenal" va "Barselona". U o‘yinning haqiqiy didini o‘ziga singdirdi. Ustozlaring Arsen Venger va Pep Gvardiola bo‘lsa, xato qilish qiyin", - deya Sakkining so‘zlarini keltiradi La Gazzetta dello Sport.

"Komo" futbolchilarining maydonda qanday harakatlanayotganiga qarang. Ular doimo nima qilishni, qanday pozisiya egallashni va qiyin vaziyatlardan qanday chiqishni bilishadi. "Komo"ning o‘yinini tomosha qilib, kichik provinsiya jamoasi deysizmi? Yo‘q. Bu kimning xizmati, murabbiyning emasmi?".

Shuningdek, Sakki "Komo" neapolliklar bilan uchrashuvda "avtobus qo‘ymaydi" degan fikrni bildirdi.