Joriy yilning 4–11 noyabr kunlari Saudiya Arabistoni poytaxti — Ar-Riyod shahrida bo‘lib o‘tadigan VI Islom birdamlik o‘yinlarida futzal bo‘yicha O‘zbekiston milliy terma jamoasi ham ishtirok etadi.

Musobaqa oldidan, bugun O‘zbekiston futzal federasiyasi prezidenti Bekzod Mamatqulov milliy terma jamoa a’zolari bilan uchrashuv o‘tkazdi. Suhbat davomida federasiya rahbari jamoa a’zolariga o‘zining samimiy tilaklarini izhor etib, ularni mas’uliyatli musobaqada Vatan sharafini munosib himoya qilishga chorladi.

“Vatan sha’ni, millat sharafi har narsadan ulug‘. Buni hech qachon yoddan chiqarmang. Sizning har bir o‘yinlaringiz mehnatkash xalqimiz va futbol ishqibozlarimizning diqqat-e’tiborida bo‘ladi. Yutuq va g‘alabalaringiz ortida millionlab insonlarning orzu-umidlari turadi. Shu bois, bor kuch va mahoratingizni ishga solib, muxlislar ishonchini oqlab, yurtimizga yorug‘ yuz bilan qaytishingiz lozim. Biz sizlarga ishonamiz!” — dedi Bekzod Mamatqulov.

O‘FF prezidenti milliy jamoadan hujumkor va chiroyli o‘yin, muxlislarga quvonch ulashadigan natijalar kutayotganini alohida ta’kidladi.

Uchrashuv davomida O‘zbekiston milliy terma jamoasi bosh murabbiyi Nodir Eliboyev jamoa Islom birdamlik o‘yinlariga puxta tayyorgarlik ko‘rganini ma’lum qildi. Shuningdek, jamoa yetakchi futbolchilari — Mashrab Adilov va Elbek To‘lqinovlar ham so‘zga chiqib, musobaqada munosib ishtirok etish, O‘zbekiston bayrog‘ini baland ko‘tarishni maqsad qilishganligini bildirishdi.

“Turnir davomida jamoa a’zolari bor kuch va g‘ayratlarini safarbar etib, muxlislarimizni quvontiradigan natijalar va albatta yurtimizga yorug‘ yuz bilan qaytish niyatidamiz,” — dedi jamoa sardori Mashrab Adilov.

Yig‘ilish yakunida terma jamoa a’zolari oldida Vatan sha’ni va xalq ishonchi turganligi yana bir bor ta’kidlanib, nufuzli bellashuvlarda futzalchilarimizga omad va zafarlar tilandi.

Eslatib o‘tamiz, futzal bo‘yicha O‘zbekiston terma jamoasi 2 noyabr kuni Saudiya Arabistoniga uchib ketadi va 4 noyabr sanasidan Islom Birdamligi o‘yinlaridagi ishtirokini boshlaydi.