Bugun, 6 noyabr kuni, Saudiya Arabistoni poytaxti Ar-Riyod shahrida VI Islom birdamligi o‘yinlari doirasida 2-tur uchrashuvlari bo‘lib o‘tadi. Ushbu turda O‘zbekiston terma jamoasi Ozarbayjon jamoasiga qarshi maydonga tushadi.

Har ikki jamoa ham musobaqani g‘alaba bilan boshlaganini inobatga olsak, bu bahs murosasiz va shiddatli o‘tishi kutilmoqda. Zero, mazkur bellashuv “olti ochkolik o‘yin” sifatida baholanmoqda — g‘olib jamoa yarim finalga chiqish masalasini muddatidan oldin hal qilib oladi.

Saudiya Arabistoniga qarshi 1-turda ishonchli g‘alabaga erishgan Nodir Eliboyev shogirdlari kechagi mashg‘ulotlarni ko‘tarinki kayfiyatda o‘tkazishdi. Ertalab jamoa nazariy mashg‘ulot bilan shug‘ullandi — murabbiylar shtabi bilan birgalikda Ozarbayjon terma jamoasining ilk turdagi o‘yini tahlil qilindi va raqibning kuchli hamda zaif tomonlari muhokama etildi.

Kunning ikkinchi yarmida Olimpiya sport majmuasida amaliy mashg‘ulot bo‘lib o‘tdi. Unda nazariy jihatdan muhokama qilingan taktik ishlanmalar amalda sinovdan o‘tkazildi. Shuningdek, raqibning o‘yin uslubiga qarshi turli taktik yondashuvlar ustida ish olib borildi.

Eslatib o‘tamiz, O‘zbekiston – Ozarbayjon terma jamoalari o‘rtasidagi bellashuv 6 noyabr kuni soat 18:00 da boshlanadi.