2026 yilgi jahon chempionatining yana uch ishtirokchisi ma’lum bo‘ldi. KONKAKAF mintaqasidagi uchinchi saralash bosqichi yakunlariga ko‘ra, Gaiti, Panama va Kyurasao terma jamoalari bo‘lajak mundial yo‘llanmasini qo‘lga kiritdi. So‘nggi turda gaitiliklar Nikaraguani mag‘lub etdi (2:0), panamaliklar Salvadordan ustun keldi (3:0), Kyurasao jamoasi esa Yamayka bilan ochkolarni bo‘lishdi (0:0).
Gaiti va Panama tarixda ikkinchi marta - 1974 va 2018 yillardan beri jahon chempionatida ishtirok etadi. Kyurasao turnirning final bosqichida debyut qiladi.
JCH-2026 AQSH, Kanada va Meksikada bo‘lib o‘tadi, turnir o‘yinlari kelasi yilning 11 iyunidan 19 iyuliga qadar o‘tkaziladi. Musobaqada ilk bor 48 ta terma jamoa ishtirok etadi - ulardan 42 tasi aniqlangan.
