"Tottenxem" markaziy hujumchisi Dominik Solanke jarohatidan tiklanayotganiga izoh berdi.
Angliyalik futbolchi joriy mavsum Angliya chempionati boshlanishida to‘pig‘idan jarohat olgan. Shu sababli u avgust oyidan beri maydonga tushmayapti.
"Bu juda og‘ir edi. Jarohat qanchalik jiddiy ekanligini tushunmadik. Men iloji boricha tezroq qaytishga harakat qildim, lekin bu amalga oshmadi, shuning uchun operasiya qilishga majbur bo‘ldim. O‘shandan beri qaytish ustida ishlayapman," - deya Solankening so‘zlarini keltiradi The Athletic.
Joriy mavsumda Solanke "shporlar" safida atigi uchta o‘yinda maydonga tushib, gol ura olmadi. Hujumchining "Tottenxem" bilan shartnomasi 2030 yilning yoziga qadar mo‘ljallangan.
