"Тоттенхэм" марказий ҳужумчиси Доминик Соланке жароҳатидан тикланаётганига изоҳ берди.
Англиялик футболчи жорий мавсум Англия чемпионати бошланишида тўпиғидан жароҳат олган. Шу сабабли у август ойидан бери майдонга тушмаяпти.
"Бу жуда оғир эди. Жароҳат қанчалик жиддий эканлигини тушунмадик. Мен иложи борича тезроқ қайтишга ҳаракат қилдим, лекин бу амалга ошмади, шунинг учун операция қилишга мажбур бўлдим. Ўшандан бери қайтиш устида ишлаяпман," - дея Соланкенинг сўзларини келтиради The Athletic.
Жорий мавсумда Соланке "шпорлар" сафида атиги учта ўйинда майдонга тушиб, гол ура олмади. Ҳужумчининг "Тоттенхэм" билан шартномаси 2030 йилнинг ёзига қадар мўлжалланган.
