O‘zbekiston terma jamoasining 2026-yilgi Jahon chempionati guruh bosqichidagi raqiblari — Kolumbiya hamda Portugaliya terma jamoasining mart oyidagi FIFA kunlari uchun raqiblari ma’lum bo‘ldi.

Unga ko‘ra, Portugaliya mart oyida Jahon chempionatining mezbonlari hisoblangan Meksika hamda AQSHga qarshi maydonga tushadi. Mexico News nashrining xabariga ko‘ra, Meksika hamda Portugaliya o‘rtasidagi bahs “Asteka” stadionida bo‘lib o‘tadi. AQSHga qarshi bahs esa Atlanta shahridagi “Mersedes-Benz” arenasida o‘tishi belgilangan.

Kolumbiya terma jamoasi esa Fransiya hamda Xorvatiyaga qarshi maydonga tushadi. Har ikki bahs ham AQSHda bo‘lib o‘tishi belgilangan. Ammo qaysi stadionda o‘tishi aniq emas. Ammo Croatian Sport nashriga ko‘ra, ushbu bahslarga Nyu-York hamda Orlando shaharlari mezbon bo‘lishi mumkin.

O‘zbekiston terma jamoasining raqiblari hozircha ma’lum emas. Avvalroq O‘zbekiston mart oyida Krishtianu Ronaldu boshchiligidagi Portugaliyaga qarshi o‘rtoqlik o‘yini o‘tkazishi mumkinligi haqida ham xabarlar tarqalgandi. Hatto O‘zbekiston futbol assosiasiyasi vise-prezidenti Ravshan Ermatovning sobiq FIFA hakami, hozirda Portugaliya futbol federasiyasi prezidenti bo‘lib ishlayotgan Pedro Proensa bilan muloqot qilgani aytilgandi. Ammo 5 dekabr, juma kuni bo‘lib o‘tgan qur’ada O‘zbekiston va Portugaliya bir guruhdan joy oldi. Bu esa Jahon chempionati oldidan ikki jamoa o‘rtasida o‘rtoqlik uchrashuvi bo‘lmasligini anglatadi.