O‘zbekiston milliy terma jamoasi bosh murabbiyi Fabio Kannavaro “Deportes RCN” kanaliga intervyu berib, Jahon chempionati qur’asi haqida fikr bildirdi.

“Qiyin guruhga tushdik, chunki raqiblarimiz Kolumbiya hamda Portugaliya terma jamoalari hisoblanadi. Biz kichik federasiyamiz, qolaversa bu Jahon chempionatidagi ilk ishtirokimiz. Shu sabab mundial biz uchun juda muhim tajriba bo‘ladi. Jamoa sifatida ishlashimiz kerak, chunki Portugaliya va Kolumbiya kabi raqiblarga qarshi individual o‘yin ko‘rsatish qiyin.

O‘zbekiston chempionati ham yuqori darajadagi liga emas. Shuning uchun intensivlik ham yuqori bo‘lmaydi. Shu bois biz asta-sekin bu borada yaxshilanishimiz kerak. Hozir biz Jahon chempionatiga chiqqanmiz va bu O‘zbekiston uchun katta tarix.

Barchasi faqat jamoaviy o‘yin bilan osonlashishi mumkin, chunki futbol — jamoaviy sport turi. Kolumbiya texnika, intensivlik va iste’dodga ega. Bu bahs oson kechmaydi. Bizda mavjud tarkib bilan ishlash uchun o‘n kun bo‘ladi. Mart oyida ikki o‘rtoqlik o‘yinini o‘tkazamiz va Jahon chempionatiga tayyorgarlikni davom ettiramiz”, dedi italiyalik mutaxassis.

Ma’lumot uchun, 5 dekabr, juma kuni Jahon chempionati guruh bosqichiga qur’a tashlandi. Unga ko‘ra, O‘zbekiston “K” guruhidan joy oldi. Fabio Kannavaro boshchiligidagi jamoaga Portugaliya, Kolumbiya hamda qit’alararo pley-off g‘olibi (Kongo – Yamayka/YAngi Kaledoniya) raqiblik qiladi.

O‘zbekisto ilk turda Kolumbiyaga qarshi maydonga tushadi. Bu uchrashuvga Meksika poytaxtidagi “Asteka” stadioni mezbonlik qiladi. “Oq bo‘rilar” ikkinchi turda Krishtianu Ronaldu boshchiligidagi Portugaliya bilan o‘ynaydi. Mazkur bellashuv AQSHdagi “NRG” stadionida o‘tadi. Fabio Kannavaro jamoasi oxirgi turdagi uchrashuvni Atlantadagi “Mersedes Benz” stadionda o‘tkazadi.