Ўзбекистон миллий терма жамоаси бош мураббийи Фабио Каннаваро “Deportes RCN” каналига интервью бериб, Жаҳон чемпионати қуръаси ҳақида фикр билдирди.

“Қийин гуруҳга тушдик, чунки рақибларимиз Колумбия ҳамда Португалия терма жамоалари ҳисобланади. Биз кичик федерациямиз, қолаверса бу Жаҳон чемпионатидаги илк иштирокимиз. Шу сабаб мундиал биз учун жуда муҳим тажриба бўлади. Жамоа сифатида ишлашимиз керак, чунки Португалия ва Колумбия каби рақибларга қарши индивидуал ўйин кўрсатиш қийин.

Ўзбекистон чемпионати ҳам юқори даражадаги лига эмас. Шунинг учун интенсивлик ҳам юқори бўлмайди. Шу боис биз аста-секин бу борада яхшиланишимиз керак. Ҳозир биз Жаҳон чемпионатига чиққанмиз ва бу Ўзбекистон учун катта тарих.

Барчаси фақат жамоавий ўйин билан осонлашиши мумкин, чунки футбол — жамоавий спорт тури. Колумбия техника, интенсивлик ва истеъдодга эга. Бу баҳс осон кечмайди. Бизда мавжуд таркиб билан ишлаш учун ўн кун бўлади. Март ойида икки ўртоқлик ўйинини ўтказамиз ва Жаҳон чемпионатига тайёргарликни давом эттирамиз”, деди италиялик мутахассис.

Маълумот учун, 5 декабрь, жума куни Жаҳон чемпионати гуруҳ босқичига қуръа ташланди. Унга кўра, Ўзбекистон “K” гуруҳидан жой олди. Фабио Каннаваро бошчилигидаги жамоага Португалия, Колумбия ҳамда қитъалараро плей-офф ғолиби (Конго – Ямайка/Янги Каледония) рақиблик қилади.

Ўзбекисто илк турда Колумбияга қарши майдонга тушади. Бу учрашувга Мексика пойтахтидаги “Ацтека” стадиони мезбонлик қилади. “Оқ бўрилар” иккинчи турда Криштиану Роналду бошчилигидаги Португалия билан ўйнайди. Мазкур беллашув АҚШдаги “NRG” стадионида ўтади. Фабио Каннаваро жамоаси охирги турдаги учрашувни Атлантадаги “Мерседес Бенз” стадионда ўтказади.