"Real" va Fransiya terma jamoasi hujumchisi Kilian Mbappe "PSJ"ning maosh qarzdorligi bo‘yicha ishini yutib chiqdi.

Eslatib o‘tamiz, 2024 yil sentyabr oyida Fransiya Professional futbol ligasi (LFP) parijliklarni "Real"ga tekinga o‘tgan hujumchiga 55 million yevro miqdoridagi maosh va bonuslar bo‘yicha qarzdorlikni to‘lashga majbur qilgan edi. Keyinchalik Mbappe LFP intizom qo‘mitasiga to‘lov amalga oshirilmagani bo‘yicha murojaat qildi, ammo klub LFP ustidan Parijda sudga murojaat qilgani uchun murojaat rad etildi.

Mbappe moliyaviy talablardan tashqari, klubga ruhiy bosim bo‘yicha shikoyat qilgan, shuningdek, "PSJ"ni 2023 yilda yangi shartnoma imzolashga majburlashda ayblagan - o‘shanda u asosiy tarkibdagi o‘rnidan vaqtincha chetlatilgandi. So‘nggi ma’lumotlarga ko‘ra, Kilian klubdan 253 mln yevro, "PSJ" esa sobiq futbolchidan 440 mln yevro talab qilmoqda.

Bugun mehnat nizolari bo‘yicha Parij sudi Mbappe foydasiga qaror chiqardi. "PSJ"ning sobiq futbolchiga qo‘ygan talablari to‘liq rad etildi.

"PSJ"ning hujumchidan qarzi ta’til to‘lovlarini hisobga olgan holda taxminan 61 million yevroni tashkil etadi. Klub bir oy ichida sudning to‘liq qarorini o‘zining rasmiy saytida e’lon qilishi shart.