Germaniyalik hujumchi Niklas Fyullkrug "Milan"ga transferini yakunlashdan oldin tibbiy ko‘rikdan o‘tish uchun Italiyaga uchib keldi. Bu haqda insayder Janluka di Marsio ijtimoiy tarmoqlar orqali xabar bermoqda.
Jurnalistning ma’lumotlariga ko‘ra, tomonlar bitimning barcha tafsilotlarini kelishib olgan. Fyullkrug "rossonerilar" safiga 2025/2026 yilgi mavsum oxirigacha ijara asosida o‘tadi. Mehnat shartnomasida sotib olish imkoniyati ko‘rsatiladi.
Niklas joriy mavsumda 9 ta o‘yin o‘tkazib, gol ura olmadi. Transfermarkt portali ekspertlari futbolchining bozor narxini sakkiz million yevroga baholamoqda.
