«Manchester Yunayted» bosh murabbiyi Ruben Amorim Angliya Premyer-ligasining 19-turida bo‘lib o‘tgan «Vulverxempton»ga qarshi o‘yin (1:1) haqida fikr bildirdi.

«Biz butun o‘yin davomida kurashdik. Ijodkorlik yetishmadi, ammo bu o‘yin «Nyukasl»ga qarshi bahsdan farq qilishini oldindan bilardik. O‘yin paytida energiyamiz boshqacha edi. Albatta, xursand emasmiz. Biz ilk daqiqalardanoq uch nafar hujumchi bilan o‘ynashga harakat qildik, ammo hech narsa chiqmadi — bu bizning kunimiz emas edi. O‘yin davomida juda katta darajada uyg‘unlik yetishmadi.

Agar sen «Manchester Yunayted»da o‘ynayotgan bo‘lsang, kim maydonga tushayotgani, kim zaxirada ekani yoki kim umuman o‘ynamayotgani muhim emas. Sen natija ko‘rsatishing va g‘alaba qozonishing kerak. Bizga tushayotgan bosim ana shunday. O‘yinga va futbolchilarni qanday joylashtirayotganimizga qarab, jarayonni boshqarishga urinayotganimizni ko‘rish mumkin, ammo ayrim paytlarda qiyinchiliklar yuzaga keladi. Bu o‘yin natijasini o‘zgartira olmaymiz, ammo oldinga harakat qilib, keyingi o‘yinga tayyorlanishimiz mumkin», — deya Amorimning so‘zlarini «MYU» matbuot xizmati keltiradi.

Ushbu o‘yindan so‘ng «Manchester Yunayted» 30 ochko bilan APL turnir jadvalida oltinchi o‘rinni egallab turibdi.