U23 Osiyo kubogiga 2 yosh kichik tarkib bilan yo‘l olgan O‘zbekiston yoshlar terma jamoasi turnirdagi ilk bahsini Livanga qarshi o‘tkazdi.

Ravshan Haydarov shogirdlari mazkur bahsda kichik hisobda g‘alabani qo‘lga kiritishdi. Uchrashuvning 24-daqiqasida jamoamiz olis masofadan zarba yo‘lladi. Posbon qaytargan to‘pni Amirbek Saidov yaqin masofadan darvozaga joylab, hisobni ochdi.

Ikkinchi bo‘limning dastlabki daqiqalari jamoamiz uchun omadli bo‘ldi. Dastlab jamoa sardori Ravshan Xayrullayev kombinasiyani samarali yakunlagan bo‘lsa, 57-daqiqada Sardor Bahromov olis masofadan kuchli zarba berib, hisobni yirik ko‘rinishga keltirib qo‘ydi.

Shundan so‘ng jamoamiz o‘yinni biroz susaytirishdi. Bundan esa livanliklar foydalanishdi. 65-daqiqada Leonardo Shahin jamoasining ilk golini kiritdi. Ikkinchi bo‘limga qo‘shib berilgan 5-daqiqada esa ushbu futbolchining o‘zi jarimadan yetkazilgan uzatmani bosh bilan darvozamizga joylab qo‘ydi  3:2.

Shu tariqa, O‘zbekiston U21 terma jamoasi Osiyo kubogini g‘alaba bilan boshladi. Jamoamiz keyingi turni 10-yanvar kuni Eronga qarshi o‘tkazadi. O‘yin Toshkent vaqti bilan 19:00da boshlanadi.

U23 Osiyo kubogi. "C" guruhi, 1-tur
O‘ZBEKISTON - LIVAN - 3:2 (1:0)
Gollar: Amirbek Saidov (24), Ravshan Xayrullayev (50), Sardor Bahromov (57) — Leonardo Shahin (65, 90+5)