Xabaringiz bor, kuni kecha mahoratli vinger Muhammadali Usmonov "Navbahor" bilan shartnoma imzoladi. Shundan so‘ng, futbolchi klub matbuot xizmati uchun maxsus intervyu berdi. Quyida mazkur suhbatni e’tiboringizga havola etyapmiz.
— Assalomu alaykum! Muhammadali, avvalo jamoamizga xush kelibsiz...
— Vaalaykum assalom, rahmat.
— Keling, suhbatimizni «Navbahor»ga qo‘shilishingiz haqida boshlasak...
— «Navbahor»dan menga avvallari ham takliflar bo‘lgan edi. O‘sha paytdagi klub vise-prezidenti Otabek aka Samatov ikki yil avval «Paxtakor»da o‘ynab yurgan paytlarimda taklif bilan chiqqan edilar. Biz ular bilan ko‘rishib, gaplashganmiz. O‘tgan yilgi mavsum avvalida o‘sha vaqtdagi jamoa bosh murabbiyi Sergey Ivanovich Lushan bilan birga ham meni chaqirishgan va ko‘rishgandik. Menga ishonayotganini, Sergey Ivanovich ham meni «Navbahor» tarkibida ko‘rishni istayotganini aytishdi. Menga ham ularning takliflari manzur bo‘lgan, ammo huquqiy jihatdan «Paxtakor»ga tegishli bo‘lganim bois, o‘shanda «Navbahor»ga o‘tishim ijobiy yakun topmagan edi. Keyinchalik yozda ham taklif bilan chiqishgandi, ammo nasibam «Andijon»da ekan, yakunlangan mavsumning 2-davrasini andijonliklar safida o‘tkazgan edim. Bu yil endi taqdir nasib bo‘lib, shartnoma imzoladim, bundan judayam xursandman!
— Sizda «Navbahor»dan boshqa takliflar ham bormidi?
— Albatta, «Navbahor»dan tashqari, Superliganing boshqa klublaridan ham takliflar bor edi. Lekin hozir taklif bilan chiqqan jamoalarni keltirishim ularga nisbatan hurmatsizlik bo‘lib qolmasin. Bir narsani aniq ayta olamanki, oldimda «Navbahor»dan tashqari, yana 3 ta aniq taklif bor edi.
— Nimaga aynan «Navbahor» jamoasini tanladingiz?
— Bunga juda ko‘p omillar sabab bo‘ldi. Avvalo, Namanganda futbolga qiziqish kuchliligi, namanganlik muxlislarning dovrug‘i MDH hamda Osiyo mamlakatlariga ham tarqalgani ham sabab bo‘ldi. Otam ham ko‘p yillik futbol muxlisi bo‘lganlari uchun yurtimiz jamoalari haqida yetarli ma’lumotga egalar. Dadam namanganliklar futbolni yaxshi ko‘rishadi, futbol qadr topgan joyda futbolchi ham qadrlanadi, shuning uchun «Navbahor» variantiga ko‘nglim chopyapti, deb maslahat berdilar. «Paxtakor»da o‘ynab yurgan vaqtlarimda «Navbahor»ga qarshi kechadigan o‘yin uchun Namanganga kelsak, hatto yoshlar jamoalari uchrashuviga ham juda ko‘p muxlislar kelishardi. Asosiy jamoaning o‘yinlarida stadiondagi atmosfera ham o‘zgacha bo‘lar edi. Bunday ishqibozlar qarshisida maza qilib, futbol o‘ynaydi odam. Qolaversa, bosh murabbiy Timur Tohirovich Kapadze bilan gaplashganimdan keyin aniq «Navbahor»ga borishim kerak, degan qarorga keldim.
— Yangi jamodagi dastlabki taassurotlar qanday?
— Taassurotlar yaxshi, hammasi kutganimday kechmoqda. Mashg‘ulotlar quvnoq kayfiyatda bo‘lmoqda.
— Jamoaga moslashish qanday kechmoqda?
— Moslashishda muammo yo‘q. Boisi, jamoadagi ko‘pchilik bilan oldin ham bitta jamoada to‘p surganmiz. Qolganlar ham juda yaxshi qabul qilishdi.
— Orzularingiz borasida ham to‘xtalsangiz...
— Orzularim ko‘p! Namanganga katta orzular bilan keldim. Rostini aytsam, mavsum tezroq boshlanishi hamda «Navbahor» libosidagi debyutimni intiqib kutyapman. Xudo xohlasa, namanganlik muxlislarning ko‘ngillaridan joy olishga bor kuchim bilan harakat qilaman. Ushbu jamoaga o‘tayotganimda, «Navbahor»da yaxshi o‘yin namoyish etib, bu orqali legionerga aylanishni niyat qildim. Bunga yetarlicha asos bor. Yoshlar bilan yaxshi ishlaydigan murabbiy olib kelingan va «Navbahor» juda ko‘p futbolchilarga tramplin vazifasini o‘tagan.
— Kumiringiz kim?
— Braziliyalik taniqli hujumchi Neymar.
— Yoqtirgan raqamingiz?
— O‘n birinchi raqam.
— «Navbahor»da nechanchi raqamda o‘ynamoqchisiz?
— Bu haqda o‘ylashga hali vaqt bo‘lgani yo‘q. Oldin mashg‘ulotda yaxshi mehnat qilib, mavsumga tayyorlanib olaylik, qolgani esa bir gap bo‘lar.
— Superligadagi debyut golingizni eslay olasizmi?
— Shu savolni bermasangiz bo‘lardi (kuladi). Bu kunni esdan chiqarib bo‘larkanmi? Ilk golimni 2024 yilgi mavsumda «Paxtakor» safida «Olimpik» jamoasiga qarshi kechgan o‘yinda urganman. O‘shanda «Olimpik» jamoasini Timur Tohirovich Kapadze boshqarardilar. O‘yin durang — 1:1 bo‘lib turganida, so‘nggi daqiqalarda gol urib, jamoamizning muhim g‘alabasini ta’minlagan edim.
— Raqobatdan qo‘rqmaysizmi?
— Yo‘q. Qaytanga raqobat bo‘lsa, futbolchi rivojlanadi. Raqobatning bo‘lgani yaxshi. Agar sog‘lom raqobat bo‘lsa, hech qachon, hech qayerda raqobatdan cho‘chimaganman, Xudo xohlasa, bundan keyin ham shunday bo‘ladi.
— Mazmunli suhbatingiz uchun rahmat! Yangi mavsumda chiroyli o‘yinlaringiz hamda gollaringiz bilan jamoamizning g‘alabalariga munosib hissangizni qo‘shishingizga tilakdoshmiz.
«Navbahor» PFK matbuot xizmati.
