«Arsenal» autlar bo‘yicha mutaxassis murabbiy Tomas Gronnemarkni ishga oldi. U avvalroq «Liverpul»da faoliyat olib borgan.
«To‘pchilar» standart holatlardan foydalanishni kuchaytirish va Premyer-ligada g‘alaba uchun kurashda kichik ustunliklardan samarali foyda olishni maqsad qilgan, deb yozadi The Times.
50 yoshli Gronnemark «Arsenal»da maslahatchi sifatida ishlamoqda. U jamoaning mashg‘ulot bazasiga tashrif buyurib, o‘z bilimi va uslublarini ulashmoqda.
Daniyalik sobiq futbolchi 2010 yilda to‘pni yon chiziqdan eng uzoq masofaga tashlash bo‘yicha jahon rekordini o‘rnatgan (51,33 metr). Keyinchalik u jamoalarni autlardan to‘pni nazoratda saqlash va hujumlarni boshlashda foydalanishga o‘rgatadigan murakkab metodikani ishlab chiqqan.
Tomas Gronnemark «Brentford», «Borussiya» Dortmund, «Ayaks», «Midtyulland», «Yunion» hamda Yaponiyaning «Jef Yunayted» klublariga maslahatchi sifatida ishlagan. 2018 yilda esa Yurgen Klopp uni «Liverpul» murabbiylar shtabiga taklif etgan. Mutaxassis jamoa bilan 2019/20 yilgi chempionlik mavsumida ishlagan va 2023 yilda mersisaydliklarni tark etgan.













