«Manchester Yunayted» bosh murabbiyi Maykl Kerrik Angliya Premyer-ligasining 22-turi doirasida «Manchester Siti»ga qarshi o‘yinda qo‘lga kiritilgan 2:0 hisobidagi g‘alabani izohladi.

«Bu ajoyib boshlanish, bunga gap yo‘q. Rostini aytsam, o‘yin oldidan biz, murabbiylar, o‘zaro gaplashib, yigitlar yaxshi formada ekanini aytgandik. Tayyorgarlikdan, futbolchilarning emosional holatidan, kiyim almashtirish xonasidagi muhitdan to‘liq qoniqqandik. Shuning uchun o‘yin oldidan bu jihatdan xotirjam edim. Lekin tushuning, “Siti” — juda kuchli jamoa, katta iqtidorga ega, ular tarkibni o‘zgartirishi va taktikani almashtirishi mumkin. Shu sababli reja bo‘ladi, keyin esa reja B va C’ga o‘tib, ular asosida ishlashga to‘g‘ri keladi.

Shuning uchun o‘yin qanday kechishini hech qachon oldindan aniq bilmaysiz. Ammo bugun hammasi qanday bo‘lgani — ajoyib. Yigitlar ko‘p jihatdan juda yaxshi o‘ynashdi. Emosiyalarni nazorat qilish, biz bergan ma’lumotlarni yodda tutgan holda o‘ynash va konsentrasiyani yo‘qotmaslik — bu juda yuqori darajada bajarildi», — deya Kerrikning so‘zlarini «Manchester Yunayted» rasmiy sayti keltiradi.

Eslatib o‘tamiz, «Manchester Siti»ga qarshi uchrashuv Maykl Kerrik uchun «qizillar» bosh murabbiyi sifatidagi ilk o‘yin bo‘ldi. Mutaxassis 13 yanvar kuni ushbu lavozimga tayinlanib, Ruben Amorim o‘rnini egallagan edi.

APLda 22 ta o‘yindan so‘ng «qizil iblislar» 35 ochko jamg‘arib, turnir jadvalida beshinchi o‘rinni egallab turibdi. «Shaharliklar» esa 43 ochko bilan ikkinchi pog‘onada joylashgan.