"Kristal Pelas" bosh murabbiy Oliver Glasnerni iste’foga chiqarish haqida o‘ylamoqda. Avvalroq, 51 yoshli mutaxassis mavsum yakunlangach, klubni tark etishini ma’lum qilgandi.
"Sanderlend"dan uchralgan mag‘lubiyatdan (1:2) keyin avstriyalik murabbiy tarkibdagi muammolar fonida "Pelas" rahbariyatini ochiqchasiga tanqid qildi: "Bizni tashlab ketishganini his qilyapman. Ko‘p futbolchilardan foydalana olmayman. Ular qo‘llaridan kelgancha harakat qilishdi va bularning barchasi bir necha hafta va oylardan beri davom etmoqda. Bizda atigi 12 yoki 13 kishi bor va biz qo‘llab-quvvatlashni his qilmayapmiz".
Sky Sports News xabariga ko‘ra, klub boshqaruvi raisi Stiv Perish shanba kungi o‘yindan keyin avstriyalikning so‘zlaridan hayron bo‘lgan va g‘azablangan.
Ta’kidlanishicha, endi Perish Glasnerga so‘nggi to‘rt oy davomida ishlashga ruxsat berish yoki uni hozir ishdan bo‘shatish haqida qaror qabul qilishi kerak bo‘ladi.
