Fransiyaning “Mes” klubi a’zosi Tahiris dos Santos Yangi yil arafasida Shveysariyaning Krans-Montana shahrida sodir bo‘lgan fojiali yong‘in paytida qahramonlik ko‘rsatdi.

Voqea Le Constellation tungi klubida yuz bergan bo‘lib, yong‘in oqibatida 40 kishi halok bo‘lgan, 100 dan ortiq odam tan jarohati olgan. Qurbonlar orasida 14 yoshli shveysariyalik qiz ham bor. Keyinchalik halok bo‘lganlarning aksariyati Fransiya va Italiya fuqarolari ekani ma’lum qilindi.

Manbalarga ko‘ra, 19 yoshli dos Santos yong‘in boshlangan vaqtda binoning birinchi qavatida bo‘lgan va dastlab tashqariga chiqishga muvaffaq bo‘lgan. Biroq u sevgilisi binoda qolib ketganini eshitgach, yonib turgan klubga qayta kirgan va uni tashqariga olib chiqqan. Ma’lumotlarga ko‘ra, futbolchi tanasining 30 foizi kuygan. U hozirda Germaniyaning Shtutgart shahridagi ixtisoslashtirilgan klinikada davolanmoqda. Uning sevgilisi ham kuyish jarohatlari bilan shifoxonaga yotqizilgan.

“Mes” jamoasi sardori Gotye Eyn matbuot anjumanida futbolchi va uning oilasini qo‘llab-quvvatlashini bildirib o‘tdi.

“Biz Tahiris va uning oilasi bilan birgamiz. Bu voqea futbol hayotdan ustun emasligini yana bir bor eslatdi. U nafaqat yaxshi futbolchi, balki ajoyib inson ekanligini ham ko‘rsatdi”, deydi jamoa sardori.

Dos Santosning agenti Kristof Hutto futbolchining ahvoli og‘irligini, biroq u mustaqil nafas olayotganini ma’lum qildi. Shifokorlar kuyish jarohatlaridan keyin dastlabki kunlar juda muhim ekanini, bu davrda infeksiya tushish xavfi yuqori bo‘lishini bildirdi.