Франциянинг “Мец” клуби аъзоси Таҳирис дос Сантос Янги йил арафасида Швейцариянинг Кранс-Монтана шаҳрида содир бўлган фожиали ёнғин пайтида қаҳрамонлик кўрсатди.

Воқеа Le Constellation тунги клубида юз берган бўлиб, ёнғин оқибатида 40 киши ҳалок бўлган, 100 дан ортиқ одам тан жароҳати олган. Қурбонлар орасида 14 ёшли швейсариялик қиз ҳам бор. Кейинчалик ҳалок бўлганларнинг аксарияти Франция ва Италия фуқаролари экани маълум қилинди.

Манбаларга кўра, 19 ёшли дос Сантос ёнғин бошланган вақтда бинонинг биринчи қаватида бўлган ва дастлаб ташқарига чиқишга муваффақ бўлган. Бироқ у севгилиси бинода қолиб кетганини эшитгач, ёниб турган клубга қайта кирган ва уни ташқарига олиб чиққан. Маълумотларга кўра, футболчи танасининг 30 фоизи куйган. У ҳозирда Германиянинг Штутгарт шаҳридаги ихтисослаштирилган клиникада даволанмоқда. Унинг севгилиси ҳам куйиш жароҳатлари билан шифохонага ётқизилган.

“Мец” жамоаси сардори Готье Эйн матбуот анжуманида футболчи ва унинг оиласини қўллаб-қувватлашини билдириб ўтди.

“Биз Таҳирис ва унинг оиласи билан биргамиз. Бу воқеа футбол ҳаётдан устун эмаслигини яна бир бор эслатди. У нафақат яхши футболчи, балки ажойиб инсон эканлигини ҳам кўрсатди”, дейди жамоа сардори.

Дос Сантоснинг агенти Кристоф Ҳутто футболчининг аҳволи оғирлигини, бироқ у мустақил нафас олаётганини маълум қилди. Шифокорлар куйиш жароҳатларидан кейин дастлабки кунлар жуда муҳим эканини, бу даврда инфекция тушиш хавфи юқори бўлишини билдирди.