O‘zbekiston terma jamoasi va Turkiyaning “Rizespor” klubi futbolchisi Husniddin Aliqulov jarohat sababli uzoq muddatga safdan chiqdi. Klub matbuot xizmati uning holati yuzasidan rasmiy bayonot e’lon qildi.

Aliqulov 2026 yil 19 yanvar kuni “Gyoztepe” jamoasiga qarshi uchrashuvda olgan zarbasi oqibatida chap tizzasidan jarohat olgan va o‘yinni davom ettira olmagan.

“Rizespor” klubi sog‘liqni saqlash komissiyasi raisi, professor Hasan Turutning ma’lum qilishicha, o‘tkazilgan tibbiy ko‘rik va tekshiruvlar natijasida futbolchining chap tizzasida oldingi xochsimon bog‘lam uzilishi, tizza kosachasining yarim chiqishi (patellar subluksasiya), bunga bog‘liq ravishda MPFL (tizza kosachasi bog‘lami) shikastlanishi, shuningdek ichki va tashqi menisklarda yirtilish, qon ketishi hamda shish aniqlangan.

Shundan so‘ng futbolchini jarrohlik amaliyoti orqali davolashga qaror qilingan. Ma’lumotlarga ko‘ra, Husniddin Aliqulovning maydonga qaytish muddati 6 oydan 9 oygacha vaqt olishi kutilmoqda.

Shu tariqa, 26 yoshli o‘zbekistonlik himoyachi 2026 yilgi Jahon chempionatida ishtirok eta olmasligi mumkin. Turnir 11 iyundan 19 iyulga qadar AQSH, Kanada va Meksikada o‘tkaziladi.