Hujumchi Karim Benzema payshanba kuni «Al-Ittihod»ning o‘yinini o‘tkazib yubordi. Avvalroq fransuz futbolchisi shartnomani uzaytirish bo‘yicha klub taklifida moliyaviy shartlar juda past ekanini sabab qilib, o‘zini kamsitilgandek his qilgani va shu bois maydonga tushishdan bosh tortgani haqida xabarlar tarqalgan edi.
38 yoshli Benzemaning yo‘qligiga «Al-Ittihod» bosh murabbiyi Serjiu Konseysau izoh berdi.
«Benzema masalasi bo‘yicha klubdan so‘rashingiz kerak. Mening vazifam — jamoani mashq qildirish, o‘yinlarga tayyorlash va sovrinlar qo‘lga kiritish. Qolgan barcha narsalar mening ish doiramdan tashqari. Ayta oladiganim shuki, Karim — ajoyib professional va fantastik futbolchi. Uni mashq qildirish men uchun faxr», — deya Konseysauning so‘zlarini keltiradi jurnalist Fabrisio Romano.
Ayni paytda «Al-Ittihod» Saudiya Pro-ligasi turnir jadvalida oltinchi o‘rinda bormoqda.
