Ҳужумчи Карим Бензема пайшанба куни «Ал-Иттиҳод»нинг ўйинини ўтказиб юборди. Аввалроқ француз футболчиси шартномани узайтириш бўйича клуб таклифида молиявий шартлар жуда паст эканини сабаб қилиб, ўзини камситилгандек ҳис қилгани ва шу боис майдонга тушишдан бош тортгани ҳақида хабарлар тарқалган эди.
38 ёшли Бенземанинг йўқлигига «Ал-Иттиҳод» бош мураббийи Сержиу Консейсау изоҳ берди.
«Бензема масаласи бўйича клубдан сўрашингиз керак. Менинг вазифам — жамоани машқ қилдириш, ўйинларга тайёрлаш ва совринлар қўлга киритиш. Қолган барча нарсалар менинг иш доирамдан ташқари. Айта оладиганим шуки, Карим — ажойиб профессионал ва фантастик футболчи. Уни машқ қилдириш мен учун фахр», — дея Консейсаунинг сўзларини келтиради журналист Фабрицио Романо.
Айни пайтда «Ал-Иттиҳод» Саудия Про-лигаси турнир жадвалида олтинчи ўринда бормоқда.
