"Andijon" bosh murabbiyi Samvel Babayan kecha “Shaxtyor”ga qarshi bo‘lib o‘tgan, ammo yakuniga yetmay qolgan bahs borasida klub matbuot xizmatiga shunday dedi:

“O‘rtoqlik o‘yini mavsumga tayyorgarlik ko‘rish, o‘yinni tashkil qilish, futbolchilarni tayyorgarligini bilish maqsadida o‘tkaziladi. Birinchi navbatda chempionat davomida o‘yinchilar sog‘-salomat, jismonan baquvvat holatda o‘ynashlari uchun tayyorgarlik jarayonlari olib boriladi. Ya’ni, qishki yig‘indagi barcha e’tibor mavsumga qaratiladi.

Afsuski, raqib murabbiyi tomonidan futbolchilariga keskin o‘ynash bo‘yicha ko‘rsatmalar berilgan va bunday harakatlar noto‘g‘ri. Raqib murabbiyini ko‘rsatmasi futbolchilarimizning jiddiy jarohat olishlariga sabab bo‘ldi. “Shaxtyor” o‘yinchilarini juda qo‘pol harakatlari natijasida ikki futbolchimiz jarohat oldi. Futbolda ruxsat etilmagan bunday holatlarga yo‘l qo‘yib bo‘lmaydi. Bu futbol qonun-qoidalariga ham to‘g‘ri kelmaydi. Doim feyr-pley tamoyiliga amal qilish kerak.

Yaxshihamki, o‘ynchilarimizni holati yaxshi. Rahbariyat, tibbiyot xodimlar shtabi kechasi bilan o‘yinchilarimizning holatini nazorat qildik, tekshiruvlar o‘tkazdik va kerakli ishlarni amalga oshirdik. Xudoga shukrki, ularni ahvoli yaxshi. Abdulvohid G‘ulomov operasiya qilindi. Abdurahmon Komilovni holati qoniqarli. Tez kunlarda ularni sog‘ayib ketishiga ishonch bildiraman. Tayyorgarligimizni keyingi jarayonida jamoamiz bilan bunday muammoli holatlar yuzaga kelmaydi, deb umid qilaman”, - deydi Samvel Vyacheslavovich.