Ijara asosida «Galatasaray»ga o‘tgan «Napoli» vingeri Noa Lang Antonio Konte bilan o‘rtadagi sovuq munosabatlar haqida gapirib berdi. 26 yoshli futbolchi yanvar oyi oxirida Turkiya klubiga ko‘chib o‘tdi. Vaholanki, atigi yarim yil avval «Napoli» niderlandiyalik futbolchini PSVdan 25 million yevroga sotib olgan edi.
«Biz Konte bilan til topisha olmadik. Bilaman, odamlar meni aybdor deb o‘ylashmoqda, ammo vaqt o‘tishi bilan haqiqat baribir oydinlashadi. Klubdagi deyarli hamma bilan munosabatlarim ajoyib edi, o‘n kishidan to‘qqiztasi mening ketishimni xohlamagandi. Sizga nisbatan adolatli munosabatda bo‘lishlari juda muhim, biroq men buni his qilmadim», – deya jurnalist Nikolo Skira Langning so‘zlarini keltirmoqda.
Lang Italiyaning amaldagi chempioni safida 27 ta o‘yinda maydonga tushib, bitta gol va ikkita golli uzatmaga mualliflik qildi.
