Ижара асосида «Галатасарай»га ўтган «Наполи» вингери Ноа Ланг Антонио Конте билан ўртадаги совуқ муносабатлар ҳақида гапириб берди. 26 ёшли футболчи январь ойи охирида Туркия клубига кўчиб ўтди. Ваҳоланки, атиги ярим йил аввал «Наполи» нидерландиялик футболчини ПСВдан 25 миллион еврога сотиб олган эди.
«Биз Конте билан тил топиша олмадик. Биламан, одамлар мени айбдор деб ўйлашмоқда, аммо вақт ўтиши билан ҳақиқат барибир ойдинлашади. Клубдаги деярли ҳамма билан муносабатларим ажойиб эди, ўн кишидан тўққизтаси менинг кетишимни хоҳламаганди. Сизга нисбатан адолатли муносабатда бўлишлари жуда муҳим, бироқ мен буни ҳис қилмадим», – дея журналист Николо Скира Лангнинг сўзларини келтирмоқда.
Ланг Италиянинг амалдаги чемпиони сафида 27 та ўйинда майдонга тушиб, битта гол ва иккита голли узатмага муаллифлик қилди.
