Milanning «Inter» klubi prezidenti Juzeppe Marotta jamoaning ushbu qishki transfer oynasidagi sustkashligi borasida fikr bildirdi.

«Transfer oynasi — bu jamoalar o‘z muammolarini hal qiladigan vaqt, ammo bizga buning keragi yo‘q, chunki yozda katta hajmdagi ishni amalga oshirganmiz. Kivu, shuningdek, yoshlar akademiyasi o‘yinchilariga ham ishonishi mumkin, shuning uchun biz hammasidan mamnunmiz», — dedi Marotta Sport Mediaset nashriga bergan intervyusida.

Hozirgi vaqtda «Inter» 23 uchrashuvda 55 ochko jamg‘argan holda Italiya chempionati turnir jadvalida peshqadamlik qilmoqda. Ikkinchi o‘rinda borayotgan «Milan» bilan farq besh ochkoni tashkil etadi.

A Seriyaning navbatdagi turida Kristian Kivu shogirdlari safarda «Sassuolo»ga qarshi bahs olib borishadi. Uchrashuv 8 fevral kuni Toshkent vaqti bilan soat 22:00 da boshlanadi.