"Real Madrid" vingeri Franko Mastantuono o‘z jamoadoshi Jud Bellingem haqida gapirdi. 18 yoshli futbolchi o‘tgan yilning avgust oyida Argentinaning "River Pleyt" klubidan "qaymoqranglilar" safiga kelib qo‘shilgan edi.
"Bellingem — ajoyib futbolchi va inson, men uni juda yaxshi ko‘raman. U "Real"da menga juda ko‘p yordam berdi", — deya yosh argentinalikning so‘zlarini keltirmoqda Ispaniya OAVlari.
Franko Mastantuono "Real" safida barcha turnirlarda 23 ta o‘yinda maydonga tushib, o‘z hisobiga uchta gol va bitta golli uzatmani yozdirib qo‘ydi. Chiqib kelayotgan yulduzning madridliklar bilan shartnomasi 2031 yilning yoziga qadar mo‘ljallangan.
Jud Bellingem esa 2023 yildan beri "qirollik klubi" sharafini himoya qilib kelmoqda.
