«Andijon» kecha Ukrainaning nomdor va tajribali «Zarya» klubiga qarshi o‘rtoqlik uchrashuvida 0:0 hisobida durang qayd etdi. Hisob tablosida gollar bo‘lmaganiga qaramay, maydonda andijonliklar tomonidan juda yaxshi va ishonchli o‘yin namoyish etildi.

Uchrashuv davomida futbolchilarimiz to‘pni nazorat qilish, hujumlarni oqilona qurish va xavfli vaziyatlar yaratishda faol bo‘lishdi. Har ikkala bo‘limda ham raqib darvozasi oldida real golli imkoniyatlar yuzaga keldi.

"Andijon" himoyada ham intizomli harakat qildi, raqibning bosimlariga qarshi bardoshli o‘yin ko‘rsatdi va darvozamiz daxlsizligini saqlab qoldi.

Bu bellashuv «Andijon»ning jismoniy tayyorgarligi, jamoaviy o‘yini va taktik jihatdan o‘sib borayotganini yaqqol ko‘rsatdi. Eng muhimi, jamoa maydonda o‘z uslubini topib borayotgani va har bir o‘yinda yanada ishonchli ko‘rinishga ega bo‘layotgani sezildi.

Ushbu uchrashuv natijasi — faqat hisob emas, balki jamoamizning kelajakdagi rasmiy o‘yinlar oldidan tayyorligi va ruhiy holatining yaxshi ekanini ko‘rsatuvchi muhim ko‘rsatkichdir.

«Andijon» muxlislariga umid va ishonch ulashgan ushbu o‘yin kelgusi bellashuvlarda yanada yaxshi natijalar uchun mustahkam poydevor bo‘ladi.

«Andijon» - «Zarya» (Ukraina) - 0:0.
5 fevral. Antaliya. “Susesi sport markazi” stadioni.
Bosh hakam: Robertas Shmitas.
Yordamchi hakamlar: Vitantis Kazlauskas, Ayvaras Lukoshus.
Zaxira hakami: Egidius Amsheus (barchasi - Litvadan)
«Andijon»: Rahimjon Davronov, Ibrohim Yo‘ldoshev, Odil Abdumajidov, Nemanya Chalasan, Mahmud Maxamadjonov, Aleksandr Andronikashvili, Jamshid Boltaboyev, Xumoyunmirzo Iminov, Usmonali Ismonaliyev, Doniyor Abdumannopov, Po‘latxo‘ja Xoldorxonov.
Zaxiradan maydonga tushganlar: Damir Temirov, Muhammadkarim Toirov, Sardor Azimov, Kristian Novak, Abbos Abdug‘afforov.
«Zarya»: Oleksandr Saputin, Jordan, Gabriyel Yeskinya, Roman Vantux, Deyan Popara, Artyom Slesar, Pilip Budkivskiy, Malyash Navin, Verley Reynaldino, Bogdan Kushnirenko, Nemanya Andyusich.