Madridning «Real» klubi yarim himoyachisi Orelyen Tchuameni jamoadoshi Kilian Mbappening o‘yiniga baho berdi.

27 yoshli hujumchi La Liganing yakshanba kungi «Valensiya»ga qarshi bahsida (2:0) gol urib, o‘z golli seriyasini davom ettirdi. Fransiyalik futbolchi hisobida joriy mavsumdagi barcha musobaqalarda o‘tkazilgan 31 ta o‘yinda 38 ta gol mavjud.

Uchrashuv yakunlangach, jurnalistlar Tchuamenidan Mbappe klub tarixida eng ko‘p gol urish bo‘yicha rekordchi hisoblangan Krishtianu Ronaldudan o‘zib keta olishi haqida so‘rashdi.

«Albatta, menimcha, u bunga qodir. Kilian bilan birga o‘ynash — ulkan mamnuniyat», — deya Tchuamenining so‘zlarini keltirmoqda Ispaniya OAVlari.

Umumiy hisobda Mbappe 2024 yilda jamoaga kelganidan beri «Real» uchun 90 ta gol urdi. Ronaldu esa o‘z vaqtida 450 ta aniq zarba bilan tarixda qolgan.