Мадриднинг «Реал» клуби ярим ҳимоячиси Орельен Тчуамени жамоадоши Килиан Мбаппенинг ўйинига баҳо берди.

27 ёшли ҳужумчи Ла Лиганинг якшанба кунги «Валенсия»га қарши баҳсида (2:0) гол уриб, ўз голли сериясини давом эттирди. Франциялик футболчи ҳисобида жорий мавсумдаги барча мусобақаларда ўтказилган 31 та ўйинда 38 та гол мавжуд.

Учрашув якунлангач, журналистлар Тчуаменидан Мбаппе клуб тарихида энг кўп гол уриш бўйича рекордчи ҳисобланган Криштиану Роналдудан ўзиб кета олиши ҳақида сўрашди.

«Албатта, менимча, у бунга қодир. Килиан билан бирга ўйнаш — улкан мамнуният», — дея Тчуаменининг сўзларини келтирмоқда Испания ОАВлари.

Умумий ҳисобда Мбаппе 2024 йилда жамоага келганидан бери «Реал» учун 90 та гол урди. Роналду эса ўз вақтида 450 та аниқ зарба билан тарихда қолган.