Bosniyalik hujumchi Edin Jeko futbol mezonlariga ko‘ra ancha katta yoshga borib qolganiga qaramay, gol urishni unutgani yo‘q. U o‘zining yangi klubi — "Shalke"dagi ilk o‘yinidayoq gol urgan bo‘lsa, bu safar muvaffaqiyatini ikki barobarga oshirdi — Drezdenning "Dinamo"si darvozasiga ikkita to‘p kiritdi.

To‘g‘ri, Jekoning gollari (52 va 70-daqiqalar) "Shalke"ning g‘alaba qozonishiga yordam bermadi. Uchrashuvning so‘nggi 12 daqiqasida mehmonlar vaziyatni o‘zgartirib, hisobni tenglashtirishga muvaffaq bo‘lishdi (2:2). Natijada "Shalke" Germaniyaning kuchi bo‘yicha ikkinchi divizionidagi peshqadamlikni "Darmshtadt"ga boy berdi.

Shuni ta’kidlash joizki, ushbu dubli bilan Jeko 39 yoshu 327 kunligida Ikkinchi Bundesliga tarixida bitta o‘yinda ikkita gol urgan eng yoshi katta futbolchiga aylandi. Keyingi turda "Shalke" "Xolshtayn" jamoasiga qarshi maydonga tushadi.