Босниялик ҳужумчи Эдин Жеко футбол мезонларига кўра анча катта ёшга бориб қолганига қарамай, гол уришни унутгани йўқ. У ўзининг янги клуби — "Шальке"даги илк ўйинидаёқ гол урган бўлса, бу сафар муваффақиятини икки баробарга оширди — Дрезденнинг "Динамо"си дарвозасига иккита тўп киритди.
Тўғри, Жеконинг голлари (52 ва 70-дақиқалар) "Шальке"нинг ғалаба қозонишига ёрдам бермади. Учрашувнинг сўнгги 12 дақиқасида меҳмонлар вазиятни ўзгартириб, ҳисобни тенглаштиришга муваффақ бўлишди (2:2). Натижада "Шальке" Германиянинг кучи бўйича иккинчи дивизионидаги пешқадамликни "Дармштадт"га бой берди.
Шуни таъкидлаш жоизки, ушбу дубли билан Жеко 39 ёшу 327 кунлигида Иккинчи Бундеслига тарихида битта ўйинда иккита гол урган энг ёши катта футболчига айланди. Кейинги турда "Шальке" "Хольштайн" жамоасига қарши майдонга тушади.
