8 fevral kuni "Park de Prens" stadionida bo‘lib o‘tgan Fransiya chempionatining 21-turi doirasidagi "PSJ" va "Marsel" (5:0) uchrashuvida parijlik muxlislar salbiy taassurot qoldirdi. Bu haqda "Le Parisien" nashri xabar bermoqda.
"PSJ" ishqibozlari raqib sha’niga haqoratli so‘zlarni hayqirishdi va shunday mazmundagi bannerlarni namoyish etishdi. Ularning ba’zi ifodalari irqchilik sifatida baholanishi mumkin, garchi manba tomonidan so‘ralgan huquqshunos buni isbotlash qiyinligiga shubha bildirgan bo‘lsa-da.
Muxlislar juda ko‘p miqdorda fayerlar (mash’alalar) yoqqanliklari sababli o‘yin tugashiga 20 daqiqa qolganda to‘xtatildi. "PSJ" rahbariyati o‘yindan oldin muxlislardan bunday harakatlardan tiyilishni so‘rab, buning oldini olishga harakat qilgan edi.
O‘tgan safar klub muxlislari "Parij" FKni haqorat qilganda, "PSJ" tribunalardan birini qisman yopish jazosi bilan jazolangan edi. Endilikda bu holat takrorlangach, 18 fevral kuni mahalliy Intizom qo‘mitasi yana shunday (yoki undan og‘irroq) jazo chorasini qo‘llashini taxmin qilish uchun barcha asoslar mavjud.
