8 февраль куни "Парк де Пренс" стадионида бўлиб ўтган Франция чемпионатининг 21-тури доирасидаги "ПСЖ" ва "Марсель" (5:0) учрашувида парижлик мухлислар салбий таассурот қолдирди. Бу ҳақда "Le Parisien" нашри хабар бермоқда.

"ПСЖ" ишқибозлари рақиб шаънига ҳақоратли сўзларни ҳайқиришди ва шундай мазмундаги баннерларни намойиш этишди. Уларнинг баъзи ифодалари ирқчилик сифатида баҳоланиши мумкин, гарчи манба томонидан сўралган ҳуқуқшунос буни исботлаш қийинлигига шубҳа билдирган бўлса-да.

Мухлислар жуда кўп миқдорда файерлар (машъалалар) ёққанликлари сабабли ўйин тугашига 20 дақиқа қолганда тўхтатилди. "ПСЖ" раҳбарияти ўйиндан олдин мухлислардан бундай ҳаракатлардан тийилишни сўраб, бунинг олдини олишга ҳаракат қилган эди.

Ўтган сафар клуб мухлислари "Париж" ФКни ҳақорат қилганда, "ПСЖ" трибуналардан бирини қисман ёпиш жазоси билан жазоланган эди. Эндиликда бу ҳолат такрорлангач, 18 февраль куни маҳаллий Интизом қўмитаси яна шундай (ёки ундан оғирроқ) жазо чорасини қўллашини тахмин қилиш учун барча асослар мавжуд.