«Manchester Siti» ustozi Xosep Gvardiolaning fikricha, Rodri hali o‘zining eng yuqori sport formasiga (pik nuqtasiga) chiqqani yo‘q.
Ispaniyalik yarim himoyachi o‘tgan mavsum boshida olgan og‘ir jarohatidan so‘ng formaga kirishi uchun uzoq vaqt kerak bo‘ldi. Yanvar oyidan boshlab «Oltin to‘p» sohibi yana muntazam ravishda maydonda ko‘rina boshladi.
«Yo‘q, Rodri hali eng yuqori formasiga chiqmadi. U joriy mavsum yakunigacha o‘z holatini tiklab olishi kerak va keyingi mavsumda u chinakam pik nuqtasida bo‘ladi. Albatta, gap faqat Rodrida emas, lekin bu alohida holat: u o‘z uzatmalari bilan raqib chiziqlarini 40, 50, 60 martalab yorib o‘tadi — boshqa hech kim buni bunday qila olmaydi. O‘tgan mavsumda boshimizga tushgan ko‘ngilsizliklar Rodri sog‘lom bo‘lganida sodir bo‘lmasdi. Buni hamma biladi. Ammo men uning zimmasiga haddan tashqari katta mas’uliyat yuklashni istamayman», — dedi Gvardiola matbuot anjumanida.
