"Barselona" sport direktori Deku klub nima sababdan istiqbolli futbolchi Dro Fernandesni qo‘ldan chiqargani haqida gapirib berdi.
18 yoshli yarim himoyachi yanvar oyida "PSJ" safiga borib qo‘shildi. Fransiya grandi ispaniyalik futbolchining shartnomasida ko‘rsatilgan tovon puli haqidagi bandni faollashtirdi.
"Dro yoshiga ko‘ra yoshlar jamoasida o‘ynashi mumkin bo‘lsa-da, Flikka ma’qul kelgani uchun asosiy jamoa bilan mashg‘ulot o‘tkazish imkoniyatiga loyiq edi. O‘ylashimcha, agar u asosiy tarkibda imkoniyat olmaganida, bunchalik katta shov-shuv ko‘tarilmagan bo‘lardi. Lekin bu birinchi marta sodir bo‘layotgani yo‘q — bundan oldin ham shunday holatlar kuzatilgan.
Droning shartnomasida tovon puli belgilangan edi va biz yangi kelishuv borasida o‘z vaqtida kelishib olishga ulgurmadik. Uning agenti bilan og‘zaki kelishuvimiz bor edi: muzokaralar u 18 yoshga to‘lishi bilan boshlanishi kerak edi. Ammo sodir bo‘ladigan ish bo‘ldi. Hammasi juda tez yuz berdi", — deya Dekuning so‘zlarini "Barca Universal" nashri keltirmoqda.
Dro Fernandes yaqinda "Marsel"ga qarshi kechgan o‘yinda (5:0) "PSJ" safida debyut qildi.
