"Барселона" спорт директори Деку клуб нима сабабдан истиқболли футболчи Дро Фернандесни қўлдан чиқаргани ҳақида гапириб берди.
18 ёшли ярим ҳимоячи январь ойида "ПСЖ" сафига бориб қўшилди. Франция гранди испаниялик футболчининг шартномасида кўрсатилган товон пули ҳақидаги бандни фаоллаштирди.
"Дро ёшига кўра ёшлар жамоасида ўйнаши мумкин бўлса-да, Фликка маъқул келгани учун асосий жамоа билан машғулот ўтказиш имкониятига лойиқ эди. Ўйлашимча, агар у асосий таркибда имконият олмаганида, бунчалик катта шов-шув кўтарилмаган бўларди. Лекин бу биринчи марта содир бўлаётгани йўқ — бундан олдин ҳам шундай ҳолатлар кузатилган.
Дронинг шартномасида товон пули белгиланган эди ва биз янги келишув борасида ўз вақтида келишиб олишга улгурмадик. Унинг агенти билан оғзаки келишувимиз бор эди: музокаралар у 18 ёшга тўлиши билан бошланиши керак эди. Аммо содир бўладиган иш бўлди. Ҳаммаси жуда тез юз берди", — дея Декунинг сўзларини "Barca Universal" нашри келтирмоқда.
Дро Фернандес яқинда "Марсель"га қарши кечган ўйинда (5:0) "ПСЖ" сафида дебют қилди.
