UEFA prezidenti Aleksander Cheferin UEFA Kongressidan so‘ng o‘tkazilgan matbuot anjumanida Rossiya jamoalarini xalqaro musobaqalardan chetlatish masalasiga to‘xtalib o‘tdi. Uning so‘zlariga ko‘ra, tashkilotning bu boradagi pozisiyasida hozircha hech qanday o‘zgarish yo‘q.
«UEFAning pozisiyasi bir necha bor bayon etilgan va u o‘zgarmagan. Biz vaziyatni kuzatib boryapmiz va voqealar rivojini ko‘ramiz», — dedi Cheferin. Shuningdek, u FIFA prezidenti Janni Infantinoning Rossiya bo‘yicha aytgan gaplariga izoh berishni istamasligini, biroq UEFAning qarashi avvalgidek qolishini ta’kidladi.
Eslatib o‘tamiz, Rossiya futboliga nisbatan joriy etilgan sanksiyalar qariyb to‘rt yildan beri amal qilmoqda. Yaqinda FIFA rahbari Janni Infantino «Sky News» telekanaliga bergan intervyusida Rossiyaga qo‘yilgan taqiq hech qanday natija bermaganini va uni kamida yoshlar darajasida bekor qilish kerakligini qo‘llab-quvvatlagan edi.
Ayni paytda Rossiya terma jamoasi faqat o‘rtoqlik uchrashuvlari o‘tkazish bilan cheklanmoqda.
