UFC promousheni rahbari Dana Uayt 14-iyun kuni AQSH poytaxti Vashingtonda, Oq uyda o‘tkazilishi rejalashtirilgan turnir uchun janglar ro‘yxati (kard) to‘liq shakllantirilganini e’lon qildi. Las-Vegasda bo‘lib o‘tgan “Zuffa Boxing 3” turniridan keyingi matbuot anjumanida Uayt ushbu tadbir bo‘yicha tayyorgarlik ishlari yakunlanganini tasdiqladi.

“Nomzodlar ko‘p bo‘lishiga qaramay, turnir uchun raqiblarni tanlash va juftliklarni shakllantirish jarayoni allaqachon yakunlandi. Oq uydagi turnir kardi ustidagi ishlarni o‘tgan haftada tugatdik. Nechta titul jangi bo‘lishi haqida esa hozircha hech narsa demayman”, deya ta’kidladi Dana Uayt.

Mazkur turnir sport olamida katta qiziqish uyg‘otmoqda, boisi bu darajadagi musobaqaning AQSH prezidenti qarorgohida o‘tkazilishi tarixiy voqea hisoblanadi. Dastlab turnir AQSH mustaqilligining 250 yilligi munosabati bilan 4-iyul sanasiga rejalashtirilgani qayd etilgan edi. Biroq logistika masalalari inobatga olinib, tadbir 14-iyun sanasiga ko‘chirildi.