Chempionlar Ligasining 2025/2026 yilgi mavsumi pley-off bosqichi doirasida Belgiyaning «Bryugge» va Madridning «Atletiko» (Ispaniya) jamoalari o‘rtasidagi dastlabki uchrashuv yakunlandi. O‘yin Bryuggedagi «Yan Breydel» stadionida bo‘lib o‘tdi. Bosh hakam sifatida Glenn Nyuberg uchrashuvni boshqarib bordi. Bahs 3:3 hisobidagi durang bilan nihoyasiga yetdi.
O‘yinda hisobni 8-daqiqada mehmonlar hujumchisi Xulian Alvares penaltidan sodir etilgan zarba bilan ochdi. 45+4-daqiqada hujumchi Ademola Lukman madridliklarning ikkinchi golini urdi. 51-daqiqada mezbonlar yarim himoyachisi Rafael Onyedika bitta javob to‘pini kiritdi. 60-daqiqada esa Belgiya jamoasi hujumchisi Nikolo Trezoldi hisobni tenglashtirdi. 79-daqiqada «Bryugge» himoyachisi Xoel Ordonyes o‘z darvozasini ishg‘ol qilib qo‘ydi. Uchrashuv yakunida, 89-daqiqada yarim himoyachi Xristos Dzolis gol urib, mezbonlar uchun durangni ta’minladi.
«Atletiko» va «Bryugge» o‘rtasidagi javob uchrashuvi 24 fevral kuni Madriddagi «Sivitas Metropolitano» stadionida bo‘lib o‘tadi.
Chempionlar Ligasining umumiy bosqichi yakunlariga ko‘ra, Belgiya jamoasi 10 ochko jamg‘arib, 19-o‘rinni egallagan edi. Ispaniya klubi esa 13 ochko bilan 14-pog‘onadan joy olgan.
Musobaqaning joriy mavsumdagi finali Budapeshtdagi «Pushkash Arena» stadionida bo‘lib o‘tadi. Hal qiluvchi bahs 2026 yilning 30 mayiga belgilangan.
