Чемпионлар Лигасининг 2025/2026 йилги мавсуми плей-офф босқичи доирасида Бельгиянинг «Брюгге» ва Мадриднинг «Атлетико» (Испания) жамоалари ўртасидаги дастлабки учрашув якунланди. Ўйин Брюггедаги «Ян Брейдель» стадионида бўлиб ўтди. Бош ҳакам сифатида Гленн Нюберг учрашувни бошқариб борди. Баҳс 3:3 ҳисобидаги дуранг билан ниҳоясига етди.
Ўйинда ҳисобни 8-дақиқада меҳмонлар ҳужумчиси Хулиан Альварес пенальтидан содир этилган зарба билан очди. 45+4-дақиқада ҳужумчи Адемола Лукман мадридликларнинг иккинчи голини урди. 51-дақиқада мезбонлар ярим ҳимоячиси Рафаэль Оньедика битта жавоб тўпини киритди. 60-дақиқада эса Бельгия жамоаси ҳужумчиси Николо Трезольди ҳисобни тенглаштирди. 79-дақиқада «Брюгге» ҳимоячиси Хоэль Ордоньес ўз дарвозасини ишғол қилиб қўйди. Учрашув якунида, 89-дақиқада ярим ҳимоячи Христос Дзолис гол уриб, мезбонлар учун дурангни таъминлади.
«Атлетико» ва «Брюгге» ўртасидаги жавоб учрашуви 24 февраль куни Мадриддаги «Сивитас Метрополитано» стадионида бўлиб ўтади.
Чемпионлар Лигасининг умумий босқичи якунларига кўра, Бельгия жамоаси 10 очко жамғариб, 19-ўринни эгаллаган эди. Испания клуби эса 13 очко билан 14-поғонадан жой олган.
Мусобақанинг жорий мавсумдаги финали Будапештдаги «Пушкаш Арена» стадионида бўлиб ўтади. Ҳал қилувчи баҳс 2026 йилнинг 30 майига белгиланган.
