O‘zbekiston Respublikasi Prezidentining 2023-yil 3-noyabrdagi 355-sonli Qaroriga muvofiq, Milliy futbol markazi tuzilmasida Respublika futbol akademiyasi qayta tashkil etildi. Endilikda hududiy akademiyalarning eng iqtidorli tarbiyalanuvchilari Respublika futbol akademiyasiga jalb qilinadi.
Avvalroq Assosiasiya qoshidagi 14 ta futbol akademiyasi Birinchi ligada ishtirok etishi e’lon qilingandi. Endilikda ular qatoriga Respublika FA jamoasi ham qo‘shiladi. Bunda Respublika FA o‘z mavqeidan kelib chiqqan holda, bir vaqtning o‘zida ikki turli musobaqada ishtirok etishi ko‘zda tutilgan. Bu o‘z navbatida turli yoshdagi terma jamoalarga nomzod bo‘lgan futbolchilarning ichki musobaqalar davomida toblanib borishiga zamin yaratadi.
Avvalroq Respublika futbol akademiyasi tarbiyalanuvchilarining Olimpik klubi tarkibida faoliyatini davom ettirishi ko‘zda tutilgandi. Biroq 2025-yilgi mavsumga kelib, Olimpik klubida moliyaviy muammolar ko‘zga tashlandi. Shundan kelib chiqib, Assosiasiya rahbariyati Respublika futbol akademiyasi qoshida yuridik shaxs maqomiga ega bo‘lgan Respublika futbol akademiyasi professional futbol klubini tashkil etishga qaror qildi. Endilikda mazkur klub Proligada Olimpik futbol klubining o‘rnida ishtirok etadi.
Shuningdek, “Proliga reglamenti” talablarini inobatga olib, Respublika FA U19 jamoasi ham tashkil etiladi va u U19 chempionatida ishtirok etadi. Respublika futbol akademiyasida terma jamoalarga nomzod bir qator iqtidorli futbolchilar jam bo‘lishidan kelib chiqib, Respublika FJ (farm jamoa) Birinchi ligada Respublika FA klubining o‘rinbosarlari sifatida to‘p suradi.
