Yangi mavsum oldidan "Qo‘qon-1912" tarkibni shakllantirish ishlarini jadal davom ettirmoqda. «Shunqorlar» bir vaqtning o‘zida uch nafar futbolchi bilan shartnoma imzolab, jamoani yosh va tajribali ijrochilar bilan to‘ldirdi.

Klub safiga Turkiyaning "Beshiktosh" akademiyasi tarbiyalanuvchisi Alper O‘zdemir kelib qo‘shildi. U o‘tgan mavsum "Sivaspor" yoshlar jamoasida harakat qilgan. 2005 yilda Toshkent shahrida tug‘ilgan futbolchi markaziy himoya va tayanch yarim himoya chizig‘ida o‘ynay oladi.

Shuningdek, 2025 yilgi mavsumda "Neftchi" bilan O‘zbekiston chempionligini qo‘lga kiritgan Muhammadziyo Adhamjonov ham «Qo‘qon-1912» bilan shartnoma imzoladi. 2004 yilda Farg‘ona viloyatida tug‘ilgan himoyachi mudofaaning istalgan nuqtasida harakat qila oladi.

Jamoa yana bir tajribali yarim himoyachi — Shohruh Mahmudxo‘jayevni ham o‘z safiga qo‘shib oldi. U faoliyati davomida "Paxtakor", "Navbahor", "Dinamo", "Xo‘jand" kabi klublarda to‘p tepgan.

Shu tariqa, «shunqorlar» yangi mavsum oldidan tarkibni muvozanatli ravishda kuchaytirib, raqobatbardosh jamoa shakllantirish yo‘lida navbatdagi muhim qadamni tashladi.