Янги мавсум олдидан "Қўқон-1912" таркибни шакллантириш ишларини жадал давом эттирмоқда. «Шунқорлар» бир вақтнинг ўзида уч нафар футболчи билан шартнома имзолаб, жамоани ёш ва тажрибали ижрочилар билан тўлдирди.

Клуб сафига Туркиянинг "Бешиктош" академияси тарбияланувчиси Алпер Ўздемир келиб қўшилди. У ўтган мавсум "Сиваспор" ёшлар жамоасида ҳаракат қилган. 2005 йилда Тошкент шаҳрида туғилган футболчи марказий ҳимоя ва таянч ярим ҳимоя чизиғида ўйнай олади.

Шунингдек, 2025 йилги мавсумда "Нефтчи" билан Ўзбекистон чемпионлигини қўлга киритган Муҳаммадзиё Адҳамжонов ҳам «Қўқон-1912» билан шартнома имзолади. 2004 йилда Фарғона вилоятида туғилган ҳимоячи мудофаанинг исталган нуқтасида ҳаракат қила олади.

Жамоа яна бир тажрибали ярим ҳимоячи — Шоҳруҳ Маҳмудхўжаевни ҳам ўз сафига қўшиб олди. У фаолияти давомида "Пахтакор", "Навбаҳор", "Динамо", "Хўжанд" каби клубларда тўп тепган.

Шу тариқа, «шунқорлар» янги мавсум олдидан таркибни мувозанатли равишда кучайтириб, рақобатбардош жамоа шакллантириш йўлида навбатдаги муҳим қадамни ташлади.