«Barselona» hujumchisi Hamza Abdulkarim tez orada maydonga tushish imkoniyatiga ega bo‘ladi. Kataloniya grandi 18 yoshli futbolchi bilan fevral oyi boshida shartnoma imzolagan edi, biroq misrlik o‘yinchida ishga ruxsatnoma olish bilan bog‘liq muammolar yuzaga keldi. Jurnalist Ashraf ben Ayadning xabar berishicha, endilikda bu masala deyarli hal etilgan: yaqin kunlarda istiqbolli hujumchi «ko‘k-anorranglilar» safida to‘p tepish huquqini qo‘lga kiritadi.
«Barselona» Hamza Abdulkarimni Qohiraning «Al-Ahli» klubidan joriy mavsum yakuniga qadar, keyinchalik sotib olish huquqi bilan ijaraga olgan. Taxminlarga ko‘ra, yangi futbolchi ushbu mavsumda Ispaniyaning to‘rtinchi divizionida ishtirok etuvchi dubl jamoa safida tajriba to‘playdi.
