«Барселона» ҳужумчиси Ҳамза Абдулкарим тез орада майдонга тушиш имкониятига эга бўлади. Каталония гранди 18 ёшли футболчи билан февраль ойи бошида шартнома имзолаган эди, бироқ мисрлик ўйинчида ишга рухсатнома олиш билан боғлиқ муаммолар юзага келди. Журналист Ашраф бен Аяднинг хабар беришича, эндиликда бу масала деярли ҳал этилган: яқин кунларда истиқболли ҳужумчи «кўк-анорранглилар» сафида тўп тепиш ҳуқуқини қўлга киритади.
«Барселона» Ҳамза Абдулкаримни Қоҳиранинг «Ал-Аҳли» клубидан жорий мавсум якунига қадар, кейинчалик сотиб олиш ҳуқуқи билан ижарага олган. Тахминларга кўра, янги футболчи ушбу мавсумда Испаниянинг тўртинчи дивизионида иштирок этувчи дубль жамоа сафида тажриба тўплайди.
