So‘nggi 10 mavsum davomida Ispaniya La Ligasi doirasidagi o‘yinlarda faqatgina ikki nafar yarim himoyachi 115 tadan ko‘p uzatmani amalga oshirib, 97% va undan yuqori aniqlik bilan bahsni yakunlashga muvaffaq bo‘ldi.
«Squawka» portali ma’lumotlariga ko‘ra, bunday natija qayd etgan birinchi futbolchi «Real Madrid» a’zosi Toni Kroos bo‘lgan. U 2018 yili «Xetafe»ga qarshi o‘yinda 119 ta uzatmani amalga oshirgan va ularning 117 tasi aniq chiqqan (98% aniqlik).
Ikkinchi ko‘rsatkichni esa «Barselona» yarim himoyachisi Frenki de Yong qayd etdi. U 2025/2026 yilgi mavsumning 25-turidan o‘rin olgan «Levante»ga qarshi o‘yinda (22 fevral) yuqori samaradorlik namoyish etdi. Kataloniyaliklarning 3:0 hisobidagi g‘alabasi bilan yakunlangan bahsda de Yong 117 ta uzatmadan 114 tasini aniq manzilga yetkazib berdi (97% aniqlik).
Bundan tashqari, Frenki de Yong mazkur o‘yinda maydondagi boshqa barcha futbolchilardan ko‘proq vaziyat yaratdi — uning hisobida to‘rtta xavfli vaziyat mavjud.
